O embarazo e o parto son momentos que van pór a proba a fortaleza do voso corpo e a vosa mente. Unha boa preparación física e mental planificada uns meses antes da concepción facilitarán o camiño.
Como preparar o corpo para o embarazo
Un estado físico saudable contribúe a lograr un embarazo máis rápido e que evolucione da mellor forma. Dependendo da vosa situación física actual e o voso historial médico podedes requirir máis tempo para conseguir as condicións idóneas para un embarazo, pero polo xeral é aconsellable prepararse polo menos 3 meses antes da concepción. A continuación, tedes uns consellos para arrincar:
- A visita preconcepcional cun especialista. Fundamental para calquera parella que está a iniciar a procura do embarazo e especialmente para aquelas que tedes algunha enfermidade, condición ou tratamento que poida influír na concepción ou no desenvolvemento do embarazo como son as alteracións de tiroides, tensión arterial, diabetes, sobrepeso ou enfermidades que poden afectar á fertilidade como a endometriosis, a síndrome de ovarios poliquísticos ou a enfermidade celíaca.
- Abandonade os hábitos tóxicos. Evitar as sustancias tóxicas é recomendable en calquera etapa vital, tanto para o home como para a muller. A procura dun embarazo pode ser un momento idóneo para lograr unha vida saudable, si non a levades aínda. Deixar o tabaco, o alcol e o consumo doutras drogas mellorará a vosa fertilidade e reduciranse enormemente os riscos durante o embarazo para a nai e o voso bebé.
- Empezade a tomar suplementos de vitaminas. Podedes acudir á matrona para que vos aclare que suplemento é recomendable incorporar, como o ácido fólico ou o iodo. Habitualmente aconséllase tomalo entre 3 e 1 mes antes da concepción.
- Coidade a vosa alimentación. Unha dieta equilibrada, baixa en alimentos graxos ou ultra procesados, e rica en froitas, verduras, cereais integrais e proteínas axuda a fortalecer a vosa saúde, incluído o sistema inmune e hormonal. Isto agora cobra especial relevancia, xa que así estaredes a coidar tanto a vosa saúde como a do bebé.
- Practicade exercicio físico con regularidade. É recomendable realizar exercicio físico de 3 a 5 veces por semana, alternando exercicio aeróbico (camiñar rápido, nadar, bicicleta…) con exercicio de tonificación e forza (sentadillas, flexións…). Evitade o exercicio físico extenuante como maratóns, tríatlons, etc.
- Fortalecede o solo pélvico. Un solo pélvico san e forte axudaravos a ter un parto máis fácil, e tamén prevén complicacións no posparto como a incontinencia ou o prolapso dos órganos pélvicos. Os exercicios de Kegel, os hipopresivos ou o pilates axudaranvos a traballar o solo pélvico.
- Coidade a vosa saúde mental e emocional. A procura do embarazo pode ser estresante e difícil nalgúns momentos, sobre todo cando o desexado positivo tarda un pouco máis en chegar. En parella ou en solitario, buscade tempo para relaxarvos: meditar, ler ou compartir momentos con amigos ou familiares, axudaravos a mellorar a vosa saúde mental.
